ESPOSICIÓN NEL INSTITUTU XOVELLANOS

D’INSTRUMENTOS MUSICALES

 NA TRADICIÓN ASTURIANA

Dende’l prósimu día 18 al 27 de febreru del 2008 podrá vese na sala d’esposiciones del Institutu Xovellanos de Xixón, na Avenida la Constitución,  una amuesa d’instrumentos musicales utilizaos na tradición asturiana.

Esta esposición ye parte del material que l’asociación de Folclor Tradicional La Quintana bien recoyendo dende hai 25 años de la so formación.

La Quintana ye un collectivu que vien trabayando na investigación y la recuperación del patrimoniu cultural asturianu dende l’añu 1983.

Anguaño, una de les actividaes con más puxu dientru de los proyeutos de La Quintana ye la coordinación d’una escuela de música tradicional asturiana, escuela qu’imparte les sos enseñances nos locales del colexu públicu Rey Pelayo, qu’echó a andar nel cursu escolar 98-99, y que mantien una media de 60 alumnos.

Pa ello, los sos miembros ponen el pegoyu nel trabayu de campu pa más llueu espardir lo atropao sobre indumentaria, mitoloxía, deportes, música, etc..., con charles, esposiciones, alcuentros de músicos, conciertos didáuticos y otres actividaes.

Nesta ocasión, podremos disfrutar d’una esposición d’instrumentos musicales usaos na tradición asturiana. Nesta actividá podrán vese alrodiu de 70 instrumentos como la zanfonía, la bandurria,  la gaita, los panderos, el tambor, les xiblates d’añal, les carraques y otros, acompángase l’amuesa con una riestra de cartelos con información sobre les carauterístiques de dalgunos de los instrumentos espuestos.

Los horarios de visita sedrán los de les mañanes del centru, y los martes y miércoles de tarde, ente les 5 y les 8, hasta’l día 27 de febreru.

Habrá visites guiaes pal alumnao del centru y desplícase asina’l porqué de los soníos, los materiales utilizaos na so construcción, cantaránse y tocaránse delles pieces del repertoriu asturianu, etc..., tou ello con un entrecambiu d’entrugues a les persones asistentes faciendo l’actividá participativa y entretenía.